Комуникацијата е фундаментална за постоењето и опстанокот на луѓето, како и за една организација. Тоа е процес на креирање и споделување идеи, информации, ставови, факти, чувства од едно до друго место, личност или група.
Начинот на кој комуницираме влијае и е директно поврзан со квалитетот на нашиот живот. Конструктивната комуникација помага да имаме добри меѓучовечки односи и избалансирана добросостојба. За да развиеме добра комуникација со другите, прво треба да научиме да комуницираме со себе. Составна единица на комуникацијата е зборот. Зошто токму зборот? Затоа што зборот ја претставува креативната моќ, преку него се манифестира намерата. Ти си она што го зборуваш, а зборот говори за тебе.
Колку пати се случило кога сме во интеракција, зборовите и фацијалната експресија на соговорникот да се нејасно испратени и протолкувани, по што не сме свесни за неговата содржина и не знаеме зошто е испратена таква информација до нас, па се затекнуваме самите себе во текот на денот како се навраќаме на истото и правиме “мисловна транскрипција”? Токму поради тоа, комуникацијата не претставува самo размена и прибирање на информации, туку целосен склоп од сетила и сложени когнитивно-невролошки процеси. Секогаш е потребно да имаме цел, да бидеме свесни за она што го кажуваме и да имаме контрола над себе.
На работното место, комуникацијата е средство со кое вработените разменуваат информации и идеи. Јасната и ефективна деловна комуникација е од клучно значење за тимовите, вработените, менаџерите и раководителите да ги извршуваат своите работни задачи и да ги исполнат своите одговорности, без разлика дали се одвива face-to-face, виртуелно, внатре во организацијата или надвор од неа. Таа е двонасочна улица помеѓу испраќач и примач, која секогаш треба да содржи јасен контекст кој што ја формира поставеноста и неопходноста на изјавата, идејата или прашањето што се споделува. Откако испраќачот ќе ја проследи информацијата, примачот ја декодира пораката, односно ја обработува со своите сетила и когнитивни процеси и набљудување. Потоа, дава повратна информација за да го потврди приемот и разбирањето. Фидбекот ни кажува дека процесот на комуницирање е успешен и за двете страни. Дури и кога ќе ви кажат дека не ве разбрале, е позитивен фидбек, бидејќи со повторување на пораката ќе бидете сигурни дека нема да има недоразбирање.
Според Рикс и Гоу (Ricks and Gow), комуникацијата во компаниите е дефинирана како систем кој е одговорен да влијае на промените низ целата организација.
Доколку протокот на информации е нејасен или прекинат, може да доведе до сериозни последици за компанијата, од незадоволни вработени и клиенти, па се до изгубени проекти и профити.
Наспроти тоа, транспарентниот проток на информации е со една и единствена цел – успешна организациска комуникација.
Луѓето со добро развиени комуникациски вештини се оние кои носат решенија, поттикнуваат промени, ги мотивираат и инспирираат своите колеги, односно имаат големо влијание врз employee engagement-от.
5 вештини кои се неопходни за успешна комуникација во приватниот и деловниот живот:
- Активно слушање
Преку активно слушање, не само што ќе ја разберете пораката која ви се пренесува, туку ќе знаете и како се чувствува соговорникот.
- Невербална комуникација
Начинот на кој гледате, слушате, создавате, реагирате, гестикулирате зборува многу повеќе отколку што некогаш ќе можат зборовите. Според едно истражување од Salesforce, дури 93% од комуникацијата е невербална.
- Управување со стресот
Кога стресот станува постојан и целосно почнува да ве надвладејува, тоа може да влијае на комуникацијата, на јасноста на мислењето, како и соодветното однесување и дејствување.
- Асертивност
Она што следи по контролирање на стресот е асертивноста. Тоа значи да го изразите вашето гледиште на начин кој е јасен и директен, а сепак да ги почитувате другите.
- Емоционална контрола
Ако не сте свесни за вашите чувства во моментот на разговорот, нема да можете да ги изразите вашите потреби и искуства на начин на кој целите и често може да резултира со фрустрација, недоразбирање и конфликт.
Комуникацијата на работното место е столбот на организацијата. Создавањето и одржувањето на позитивна работна средина не се состои само од бенефитите кои ги нуди компанијата, туку почнува од ефективната комуникација на вработените и сигурноста дека тие се навремено информирани за секоја задача и промена.
За авторот:
Ивана Кајеска е дипломиран психолог при Филозофскиот факултетот во Скопје, HR ентузијаст и вљубеник во современата психологија, со 5 годишно искуство како полициски службеник и аналитичар за статистичко истражување и документирање во Министерството за внатрешни работи.
Доколку преземете содржина (статија или оглас) од 24HR задолжително наведете „Извор: 24HR“ на крајот на статијата со hyperlink кој ќе води од преземената содржина. Преземањето на интервјуа не е дозволено. Повеќе за условите за користење е наведено тука.
