Колумна на Даниел Смљиков, лиценциран психолог,Специјалист за регрутација на кандидати во Aptiv.
Во свет каде што бизнисот и технологијата брзо се менуваат, новите генерации професионалци носат свежи идеи, ентузијазам и различни перспективи. Сепак, често се соочуваат со предизвици – од скептицизам од колегите со повеќегодишно искуство, кои можеби сметаат дека младите немаат доволно знаење или работна етика, па се до чувство на недоволна поддршка во првите работни месеци. Ваквиот пристап не само што е неправеден и дискриминирачки по основ возраст, туку е и штетен за компаниите Како HR професионалци, наша задача е да ја олесниме нивната интеграција, успешното прифаќање на младите таленти може значително да влијае врз нивната мотивација и целокупната работна средина во компанијата.
Зошто е важно да ги прифатиме младите професионалци?
Свежа енергија и нови перспективи – Младите носат иновативен пристап, дигитална писменост и желба за промени. Тие можат да понудат решенија кои вработените со долгогодишно искуство можеби не би ги земале во предвид.
Долгорочна лојалност – Кога новите вработени се чувствуваат прифатени, нивната посветеност на компанијата се зголемува. Ако компанијата инвестира во нивниот развој, веројатноста да останат и да придонесуваат во рамките на истата организација е поголема.
Создавање позитивна работна култура – Тимовите кои поддржуваат нови членови создаваат отворена и инклузивна работна средина, што води до зголемена продуктивност и креативност.
Подобрување на целокупната продуктивност – Комбинирањето на искуството на вработените кои се експерти и иновативниот пристап на младите создава баланс што води до подобри резултати.
Како мотивацијата влијае врз младите професионалци?
Мотивацијата е клучен фактор за тоа колку младите професионалци ќе бидат продуктивни, ангажирани и задоволни на работното место. Еве како неколку познати мотивациски теории кои можат да помогнат во разбирањето на нивните потреби:
Масловата хиерархија на потреби – По задоволување на биолошките потреби, следни човекови потреби се чувствата на припадност и безбедност. На младите професионалци првично им е важно да бидат прифатени во тимот, да се чувствуваат сигурно, а потоа следи мотивот кон самоактуализација и успех. Ако компанијата не им ги нуди овие работи, тие брзо ќе ја изгубат мотивацијата.
Херцберговата теорија на двофакторска мотивација – Според оваа теорија, постојат фактори кои можат да предизвикаат незадоволство (неконкуретна плата, лоши меѓучовечки односи), но и фактори кои ја зголемуваат мотивацијата (можност за учење, признание, развој на кариерата).
Теоријата за самодетерминација (Deci & Ryan) – Младите луѓе најчесто се мотивирани ако добијат автономија и слобода (можност да донесуваат одлуки), компетентност (шанса да го покажат својот потенцијал) и поврзаност (добри односи со тимот).
Како HR професионалците можат да помогнат?
Менторска поддршка – HR тимот треба да создаде култура и програма каде искусните вработени можат да им помогнат на младите да се вклопат и да научат побрзо (транспарентни разговори, активно слушање, јас-пораки до подобро интегирање на вработените).
Јасни очекувања и фидбек – Новите вработени сакаат да знаат дали добро работат и што можат да подобрат, поставување на јасни цели и добивање на јасно разбирливи повратни одговори за сработеното. Критиката да се замени со развоен конструктивен фидбек и сендвич пораки.
Можности за развој – Тренинзи, вмрежување и работилници можат да им дадат чувство на прогрес и мотивација за понатамошен ангажман.
Инклузивна култура и видливост – Кога младите ќе почувствуваат дека нивните идеи и ставови се вреднувани и тие како личност и карактер се прифатени, ќе бидат посклони да останат и да придонесуваат повеќе. HR тимот треба да ги едуцира своите вработени за важноста на инклузивноста и почитта кон сите вработени, без оглед на возраста или друга лична карактеристика.
Прифаќањето на младите професионалци е инвестиција во иднината на секоја компанија. Прифаќањето на младите е клучно за градење успешни компании и одржливи работни средини во кои сите генерации соработуваат, учат едни од други и создаваат вредности.
Доколку преземете содржина (статија или оглас) од 24HR задолжително наведете „Извор: 24HR“ на крајот на статијата со hyperlink кој ќе води од преземената содржина. Преземањето на интервјуа не е дозволено. Повеќе за условите за користење е наведено тука.
