Магијата на HR-от е да ја открие супермоќта на секој вработен

од 24HR

Интервју со Кристина И. Капсарова, COO (Chief Operating Officer) во Personal Programmer.

Кристина И. Капсарова е COO (Chief Operating Officer) во холандската ИТ компанија Personal Programmer. Позади себе има богато 10 годишно искуство, а нејзиниот фокус е менаџирањето со човечки ресурси и кариерниот развој на софтвер инженерите од организациите од ИТ секторот. Нејзиното најголемо достигнување е да се биде позитивен пример, тимски играч и лидер за сите во организацијата не преку елаборирање, туку преку „засукани ракави“ и работа, како во дејноста, така и на себе. Денес, во рубриката Љубов кон HR на 24HR, ја споделуваме нејзината HR приказна.

Која е Кристина И. Капсарова?

Сакам на себе да гледам како тимски играч и лидер кој преку посветеност, неуморна работа, постојано учење и надградување на секое поле е позитивен пример и мотивација за тимот на Персонал Программер. Во ИТ светот се оди глобално и толку брзо што можам слободно да кажам дека уживам во динамично секојдневие како COO (Chief Operating Officer) во холандска компанија која има клиенти и соработници во Холандија, Соединетите Американски Држави, Канада, Швајцарија и Србија, а јас сум нишката која спојува интересни и разнолики работни култури. Неизмерната поддршка, волјата за успех, амбицијата и разбирањето ги добивам од семејството, а тоа ми дава неизмерна мотивација за како личен така и професионален раст и развој.

Што ве натера да се вљубите во HR како професија?

HR за мене претставува среќа, човечност, емпатија, нешто што дава можност за личен и професионален интегритет, нешто што ги менува и крои животите на луѓето, а тоа е она што ме натера да се вљубам во професијата. Секој заслужува да е среќен на работното место, доста време се поминува на истото и сметам дека успешните менаџери за човечки ресурси „ги бива“ да создадат работна околина со задоволни и среќни лица, успешни и исполнети со она што го работат. Секој човек е добар во нешто, природно е талантиран и наклонет кон некоја вештина или стекнал определено знаење со учење, раст, развој и труд, но „магијата“ на HR е во можноста да открие која е таа „супермоќ“ и да ги доведе на иста линија работните обврски и секојдневните задачи со желбата, мотивацијата, можностите и визијата на луѓето, па така тие посветено, со заеднички цели и страст да допринесат како најдобро знаат и умеат кон организацијата.

Од каде почнавте и како изгледаше вашата кариерна патека?

Се започна со љубопитноста што е тоа што го прави човекот подобар, како „работата го создала човекот“ различен, посебен, секој поединец – приказна за себе, а функционира како колектив на ниво на група, организација, општество, како еволуираме како човечки битија и како задоволството од работата не прави исполнети, реализирани, задоволни и лојални кон една организација. Средното мултиетничко економско училиште ми помогна да сфатам дека сите сме како единки различни и посебни, но толку слични кога станува збор за секојдневните мали нешта кои не исполнуваат. Факултетот по англиски јазик ме научи дека покрај тоа што различностите се богатство тие се и непресушен извор на знаења кои правилно искомуницирани, на било кој јазик, се клучниот „петти елемент“ кој гарантира успех. Низ годините осознав дека она што мене ме мотивира и исполнува е љубовта кон работата со луѓе, а следствено и полето на човечките ресурси кое одговара на голем дел од моите прашања. Во таа насока се одлучив за ХР магистерски студии и секогаш динамичниот ИТ свет. Морам да кажам дека сум неизмерно благодарна што Персонал Программер и сопствениците во Холандија се компанија со многу верба во талент и потенцијал и имаа доверба во мене и цел ХР тим од самиот почеток. Ми дадоа голема одговорност да ги достигнам нивните очекувања, но и отворени можности да го работам она што го сакам како најдобро знам и умеам па покрај секојдневните обврски се фокусирав на менаџирањето со човечки ресурси и кариерниот развој на софтвер инженерите од организациите од ИТ секторот. По десетина години искуство и многу вредна работа, секако тимски со најдобриот “girl power” ХР тим, преку работа на далечина која нам ни е секојдневие многу одамна можам да се пофалам дека функционираме во лесна, пријатна, нестресна работна атмосфера, се надополнуваме, растеме, и топло ги пречекуваме новите колеги кои постојано ни се придружуваат кон 50 членото семејство.

Вашето најголемо HR достигнување?

Да издвојам најголемо достигнување е многу тешко, бидејќи поголемите достигнувања кои го менуваат светот се засновани на вредна, долгорочна и упорна работа и цел. Сметам дека достигнувањата во ХР се тешко мерливи, не се некаков  пишан труд или броеви, туку се однесуваат на позитивен пример кој сите го почитуваат, сакаат да го следат и веруваат во него. За мене големо достигнување е да се биде позитивен пример, тимски играч и лидер за сите во организацијата не преку елаборирање, туку преку „засукани ракави“ и работа, како во дејноста, така и на себе. Природно секогаш и од секој може нешто да се научи, да се осознае и да се отворат нови хоризонти, а тајната е љубопитност и желбата за знаење. Во ера во која информациите и комуникациите ни се на дланка, на еден клик, а со работата од дома стануваме се поинтровертни суштества, мора да се дополнуваме, менуваме, подобруваме и надградуваме бидејќи тоа е единствен начин да зачуваме емпатијата, човечноста и продуктивноста.

Што би им порачале на сите кои размислуваат за кариера во HR?

Секому за било која кариера и да размислува би му препорачала да се проба и да види дали тоа што теоретски изгледа примамливо, така е делотворно и во пракса. Упорност, вредна работа, посветеност и многу разбирање кон луѓето. Добро запознавање со пазарот на труд и сите сегменти на ХР, особено процесот на интервјуирање како запоставен во смисла однос и фидбек и кон неодбрани кандидати. Да се има на ум дека се работи со највредниот ресурс на секоја организација, и тоа од медијаторска позиција секогаш во „средина“. Притисокот е голем бидејќи секоја информација треба да се разбере, предвиди како може да влијае и да се пренесе најточно и најпрецизно до сите во, но и вон организацијата. Можеби најдобра сугестија е свесност за значењето на ХР и соочување со предизвикот дека она што примарно ги издвојува успешните организации од неуспешните е човечкиот капитал како највреден, најзначаен и најтешко заменлив.

Што мислите за порталот 24HR?

24HR е веројатно и првиот сериозен портал за човечки ресурси во Македонија кој може да се искористи за тековно информирање, експертско знаење, валидно искуство, а преку сето тоа и напредок во полето на ХР. Вашиот портал е одлична творба, треба да сте пример како се допринесува со „споделување знаење“ базирано на стручност. Благодарна сум што ни давате можност да учиме едни од други, да споделиме искуства и да можеме да се информираме за нешта кои ни се од големо значење и помош во секојдневната работа.

0 коментар
2

Related Posts

Остави Коментар

Веб страната користи колачиња за подобро корисничко искуство. Претпоставуваме дека сте во ред со ова, но како опција можете да не ги користите. Прифати Повеќе...

Оваа веб страна користи cookies.