Колумна на Трајанка Кимова-Специјалист за човечки ресурси
Плата во огласот – вистинска бројка или само лажна надеж?
Пазарот на труд во Македонија е исполнет со парадокси кои ги чувствуваме сите – од кандидатите до работодавците. Во овој втор дел од серијалот „Македонскиот парадокс“ се фокусираме на уште еден клучен аспект: транспарентноста на платите во огласите и влијанието што го имаат нереалните понуди врз довербата и односот меѓу компании и кандидати.
Во последно време, транспарентноста на платите станува тема број еден – и тоа со право. По години молк, работниците почнаа јавно да зборуваат. За игнорирани очекувања, за недоследни понуди, за разочарувања уште пред да почне работниот однос.
И кога мислевме дека сме чекор поблиску до фер пазар на труд, некои практики не само што не се подобруваат – туку стануваат уште понеискрени, погрешни.
Замислете ситуација:
Во огласот стои плата од 45.000 до 55.000 денари.
Кандидатот аплицира, минува интервју, добива позитивен фидбек – и на крајот му се нуди 37.000 денари.
Дали ова беше само мамка за повеќе апликации?
Дали вредноста на човекот драстично се менува откако ќе се појави на разговор?
Ова не е изолиран случај – ова е аларм.
И ова не е само прашање на „бројка“ – туку на доверба.
Како кандидат да верува во компанија која не стои зад својот оглас?
Како HR професионалец да гради кредибилитет во професијата, ако го жртвуваме интегритетот за неколку илјади денари разлика?
Нема погрешна плата – има погрешна комуникација за платата.
Токму таа искривена комуникација го руши и employer branding-от и мотивацијата уште пред првиот работен ден.
Работата на човечки ресурси не е да се „надмудри“ кандидатот – туку да се изгради мост.
И токму во моментот на понуда – таа врска се тестира.
Ако не сме подготвени да ја испочитуваме вредноста што претходно сме ја комуницирале, тогаш не бараме вработен – бараме компромисна тишина.
Но времето на тишина завршува.
Луѓето говорат, споделуваат искуства, поставуваат прашања.
И тоа не е закана – тоа е можност за нов почеток.
Решението не е комплицирано:
Објавувајте реални и точни плати – не лажни бројки.
Бидете транспарентни уште од првиот контакт.
Понудете вредност која не се базира на „ќе видиме како ќе се покаже“.
И пред сè – почитувајте го човекот како партнер, не како алатка.
Време е да ја смениме насоката.
Време е да ја смениме приказната што ја раскажуваме –
од приказна со празни ветувања, во вистински дијалог со луѓето.
Време е да престанеме со манипулации –
со скриени плати, со „пазарење“ во последен момент, со практики што ја поткопуваат довербата уште на самиот почеток.
Време е за искрен пристап –
не само во огласите, туку и во секоја постапка, понуда и однос.
Транспарентноста не е луксуз – таа е темел на кредибилитет.
А довербата не се гради со зборови, туку со доследни чекори.
Време е за нова реалност во вработувањето –
онаа што ги почитува луѓето, а не ги користи.
И таа реалност ја градиме сите – од HR до врвниот менаџмент.
Трајанка Кимова
Специјалист за човечки ресурси
Трајанка е искусен HR професионалец со повеќегодишно искуство во стратегиско управување со човечки ресурси и развој на таленти. Посветена е на транспарентност и фер практики на пазарот на труд.
Доколку преземете содржина (статија или оглас) од 24HR задолжително наведете „Извор: 24HR“ на крајот на статијата со hyperlink кој ќе води од преземената содржина. Преземањето на интервјуа не е дозволено. Повеќе за условите за користење е наведено тука.
