Glassdoor ја објави листата на најдобри места за работа во 2021 година, а на самиот врв се наоѓаат технолошките компании кои се лидери во поглед на ангажманот на вработените, флексибилноста и можностите за напредок.
Софтверската компанија Salesforce се најде на врвот на листата на најдобри работодавци за 2021 година која ја објави платформата Glassdoor. На скала од 1 до 5, рејтингот на Salesforce изнесуваше 4.5.
Потоа, следат Microsoft и Abcam со 4.4, а по нив на листата се најдоа и Google, Softcat, GTB, Apple, Bella Italia, SAP и Facebook.
Листата е составена врз основа на инпутот од вработените кои на Glassdoor оставаат анонимни повратни информации за компаниите оценувајќи ја нивната работа, работната средина и третманот како работодавач.
Salesforce беше прогласена за победник во Велика Британија поради својата семејна култура, посветеност кон диверзитет и инклузија, широкиот спектар на поволности и бенефити за вработените и импактот на извршниот директор.
Всушност, тоа беше единствената компанија која што се појави на сите пет листи според земји, вклучувајќи ги Франција, Германија, САД и Канада.
Од друга страна, и покрај огромната штета што ја претрпе угостителскиот сектор поради пандемијата, четири ресторани успеаја да се пласираат во најдобрите 50, и тоа Bella Italia, Nando’s, Wagamama и Greggs.
Bella Italia се искачи од 45-тата во 2020 година на осмата позиција благодарение на својот забавен и пријателски тим, семејното чувство, добрата плата, бакшишот и попустите.
Други сектори чии компании постигнаа високи резултати беа финансии и производство.
Кристијан Сатерленд-Вонг, извршен директор на Glassdoor, вели дека очекувано коронавирусот има големо влијание на годинашната листа.
„Ковид-19 е главниот проблем со кој се соочуваме во моментов и од него е погоден секој работодавач. Годинешните победници докажаа дека дури и во вонредни околности, компаниите треба да ги поддржат своите луѓе“, изјави тој.
„Културата предводена од мисијата, транспарентното лидерство и можностите за кариера се секогаш обележја на победниците за најдобри места за работа. Оваа година, исто така, гледаме исклучителни работодавци чиј приоритет е здравјето, безбедноста и благосостојбата на нивните вработени“, додаде Сатерленд-Вонг.
Најголем пад на списокот во 2021 година имале Cisco Systems, од 13-та на 44-та позиција, Shell од 20-та на 50-та позиција и GlaxoSmithKlina која бележи пад на 46-та од 29-та позиција.
Дел од победниците за 2020 година кои годинава не се најдоа на листата се Hiscox, Topps Tiles, EasyJet, Nike, O2, Rolls Royce и Unilever.
