Петар Заборски и Петар Спасеновски од „Макпетрол“ ќе учествуваат на последниот турнир од Светската карате 1 премиер лига за 2024 година. Тие се единствените претставници од Македонија што ќе бидат дел од силното натпреварување што во Казабланка ќе се одржи од 31 мај до 2 јуни. Заборски ќе се бори во категоријата под 75 килограми, додека Спасеновски во таа под 84 килограми.
На меѓународниот собир ќе се соочат Топ-32 најдобри индивидуалци од ранг-листата на Светската карате федерација (ВКФ). Пријавени се 381 натпреварувач од 60 земји. По турнирите во Париз, Анталија и Каиро, најквалитетните светски каратисти во Мароко ќе се борат за медал, но и за престижната титула „севкупен победник“ (Grand Winner) во своите категории.
Според описот од ВКФ, спортистите што прикажале исклучителни вештини и постојани резултати во текот на сезоната ќе бидат прогласени за „севкупни победници“. Освен на борби за златни, сребрени и бронзени одличја, Казабланка ќе биде домаќин и на специјална гала-церемонија во чест на сите Grand Winners. Освојувачите на овие титули во следната сезона од премиер лигата на своите кимона ќе носат златен вез што ќе го симболизира нивниот успех.
Светската карате федерација објави и дека мечевите во живо ќе се пренесуваат и ќе можат да се следат на YouTube каналот на ВКФ.
Доколку преземете содржина (статија или оглас) од 24HR задолжително наведете „Извор: 24HR“ на крајот на статијата со hyperlink кој ќе води од преземената содржина. Преземањето на интервјуа не е дозволено. Повеќе за условите за користење е наведено тука.
