Како одговор на технолошките иновации во новата ера, промените во организациите станаа неизбежни доколку се стремиме кон успех. Ова е особено изразено во делот на лидерските улоги. Пореметувањата со кои секојдневно се соочуваме на работното место се оние, на кои повеќето од нас сè уште не сме целосно навикнати; работа од дома, скратени работни недели, флексибилно работно време и употреба на нови технологии.
Правилното лидерство е она што ја прави разликата кога се справуваме со промените. Во продолжение ќе се задржиме на двата стила на лидерство кои се покажаа успешни во справувањето со нагли и ненадејни промени.
Транзиција од традиционално во агилно лидерство:
И покрај тоа што може да изгледа како нов тренд, компаниите кои ги трансформираат своите лидерски стилови кон поагилен начин на функционирање постојат веќе една деценија. Со ваквата трансформација, една типична организација од хиерархиски стил, се претвора во отворена организација со отворена комуникација во сите делови на организацијата, каде главните цели се да се постигне флексибилност, соработка, брзо донесување одлуки и отвореност.
Пример за значајна трансформација доаѓа од PayPal, кој ја иницираше нивната промена во 2018 година. Компанијата сфати дека има голем број вработени кои работат на недефиниран производ што е далеку од очекувањата и желбите на нивните клиенти. За да одговори на овие проблеми, PayPal создаде тимско решение по Scrum методологија составено од „4 столбови“ кое изгледа вака:
1. Прво, вработените се зближуваат со клиентите преку отворена комуникација, со цел разбирање на нивните желби и потреби, што ќе им помогне во развивањето на идеален производ.
2. Второ, беше воспоставена јасна сопственост на производот, што беше од голема помош во организација на агилноста и структурирањето на портфолиото на производи на компанијата
3. Почнаа да работат со Scrum тимови (мали, мултифункционални тимови кои работат заедно фокусирајќи се на испорака на производи или услуги преку кратки работни циклуси)
4. Конечно, беа воведени KPIs за следење на прогресот и успешноста на оваа трансформација.
Важен дел од трансформацијата кој помогна промената да биде успешна, беше спроведената обука за Агилно лидерство на водечките луѓе на оваа трансформација, како и постигнатата транспарентност преку поотворени канали на комуникација и мапирањето на проекти, во кои секој вработен можеше да види на што работат другите. Ова значително ја зголеми ефикасноста на управувањето и овозможи целосна трансформација на компанијата.
Закрепнување на лидерството преку адаптивно лидерство:
Лидерите во време на ,,Ковид – 19’’ насекаде беа приморани да носат брзи одлуки соочени со непроверени информации и безброј непознати. Згора на тоа, тие мораа да ги балансираат многуте тешкотии на кризата – здравје, економија, општество, политика и култура – одеднаш.
Во навигацијата на овие предизвици, се издвои еден пристап на лидерство: адаптивно лидерство. Во суштина, овој пристап може да се подели на 4 дела:
– Антиципирање: гледање напред за да се предвидат идните потреби, трендови и опции.
– Артикулирање: јасно пренесување на овие потреби за да се изгради разбирање и поддршка.
– Адаптација: постојано учење и прилагодување на одговорите како што се развиваат ситуациите
– Одговорност: обезбедување транспарентност во одлучувањето и отвореност за повратни информации и предизвици
Моќта на овие принципи во акција може особено да се види со компании како AstraZeneca. Благодарение на своите операции во Кина, компанијата беше меѓу првите кои дознаа за вирусот и ја предвиде огромната побарувачка за медицински решенија. И покрај многуте неизвесности, AstraZeneca можеше да ги артикулира овие итни потреби на своите внатрешни тимови и надворешни партнери, обезбедувајќи ја потребната поддршка за да продолжи напред. Прилагодливоста на компанијата блесна додека се насочуваа кон нови деловни модели, формираа партнерства и развиваа иновативни решенија. Ова го вклучуваше не само нивниот развој на вакцини, туку и нивниот придонес за тестирање, поддршка на здравствените установи, па дури и користење на вештачка интелигенција за подобрување на дијагностиката. Она што навистина ја издвојува AstraZeneca е нејзината посветеност и одговорност. Компанијата вети дека ќе го поддржи одговорот на глобалната пандемија на најекономичен и најправеден можен начин. Тие склучија договори за производство и дистрибуција на вакцината без профит за време на пандемијата, нагласувајќи ја нивната посветеност за поголемото јавно добро.
Промената во лидерството е од клучно значење за организациите да бидат успешни при брзи промени. Агилното и адаптивно лидерство се покажаа како доста ефективни, но флексибилноста, отворената комуникација и одговорноста остануваат клучни фактори кои им помагаат на компаниите да напредуваат во несигурни времиња.
Доколку преземете содржина (статија или оглас) од 24HR задолжително наведете „Извор: 24HR“ на крајот на статијата со hyperlink кој ќе води од преземената содржина. Преземањето на интервјуа не е дозволено. Повеќе за условите за користење е наведено тука.
