Властите во Португалија изгласаа нов закон за работни односи кој, меѓудругото, им забранува на менаџерите да ги контактираат вработените надвор од работното време.
Новиот закон за работни односи кој беше усвоен од страна на португалскиот Парламент по зголемувањето на бројот на луѓе кои работат од дома поради Ковид-19 носи низа правила кои го дорегулираат односот помеѓу компаниите и вработените.
Во документот со кој се предлагаат новите законски измени, објавен кон крајот на октомври, се објаснува дека вработените треба да имаат право на минимум 11 последователни часови „ноќен одмор“ за време на кој тие не треба да бидат прекинати освен ако се работи за итен случај.
Правилата, исто така, бараат од работодавците да придонесат за трошоците на вработените поврзани со работата од дома, како што се интернетот и електричната енергија.
Дополнително, од менаџерите ќе се очекува да се среќаваат со членовите на персоналот лице в лице барем еднаш на секои два месеци.
Португалската министерка за труд, солидарност и социјално осигурување, Ана Мендес Годињо, на неодамнешниот веб-самит во Лисабон изјави дека пандемијата покажала дека далечинското работење ја менува играта, давајќи им на работниците моќ да одлучат од каде сакаат да работат.
Компаниите кои нема да ги почитуваат новите правила би можеле да бидат казнети, но сепак овие законски промени нема да важат за компании со помалку од 10 вработени.
Доколку преземете содржина (статија или оглас) од 24HR задолжително наведете „Извор: 24HR“ на крајот на статијата со hyperlink кој ќе води од преземената содржина. Преземањето на интервјуа не е дозволено. Повеќе за условите за користење е наведено тука.
