Европската комисија има намера да воведе регулатива со која од поголемите компании ќе се бара да ги објавуваат платите на вработените мажи и жени со цел да се намали финансискиот јаз помеѓу половите.
Според најавите на странските медиуми, Брисел уште во четвртокот требаше да објави низа задолжителни мерки со цел намалување на нееднаквоста на платите во ЕУ и намалување на разликата во заработката која во 2018 изнесуваше 14.1 процент во корист на мажите.
Новата директива ќе бара од сите 27 земји членки на ЕУ да воведат построги правила за известување за плати во компаниите со повеќе од 250 вработени.
Исто така, сите вработени ќе имаат право да знаат колкава е платата на нивните колеги. Меѓу другите мерки, на компаниите ќе им биде забрането да прашуваат колку изнесувала претходната плата на кандидатот, а вработените исто така ќе имаат право на надомест во случај на дискриминација во финансиските примања.
Директивата се заснова на принципот „иста плата за иста работа“.
Земјите членки накнадно ќе треба да одлучат како да ги казнуваат компаниите во случај на непочитување на новата директива, а паричната казна е само една од опциите.
Предложениот пакет допрва треба да биде одобрен од мнозинството членки и Европскиот парламент, а истиот доаѓа во време кога има сè поголеми индикации дека пандемијата имала посилно негативно влијание врз жените, пред сè, затоа што тие се позастапени во најпогодените сектори како туризмот и угостителството.
Доколку преземете содржина (статија или оглас) од 24HR задолжително наведете „Извор: 24HR“ на крајот на статијата со hyperlink кој ќе води од преземената содржина. Преземањето на интервјуа не е дозволено. Повеќе за условите за користење е наведено тука.
