МОТИВАЦИЈА НА РАБОТНОТО МЕСТО: ПОВЕЌЕ ОД САМО ПЛАТА

Во корпоративниот свет, мотивацијата често се поврзува со финансиските стимулации. Но, дали парите навистина се најголемиот двигател на продуктивноста? Истражувањата покажуваат дека луѓето не работат само за плата – тие сакаат признание, чувство на вредност и јасна цел.

Парите се важни, но не се сè

Без сомнение, конкурентната плата кај мнозинството работници е основен мотиватор. Но, тоа не значи дека сите ќе бидат подеднакво мотивирани само со финансиски бонуси. Клучот лежи во разликите помеѓу вработените – што ги движи, што ги инспирира и што им дава чувство на припадност?

Некои вработени ќе бидат задоволни со покачување на платата или бенефиции во други форми, но за други, важноста на нивната работа, пофалбите од менаџментот и можностите за развој се подеднакво значајни. Понекогаш, не е прашање само колку заработуваме, туку и како тоа се споредува со заработката на колегите. Чувството на фер компензација и признавање на трудот играат клучна улога во задоволството на вработените.

Успехот не е случајност – тој е резултат на труд, посветеност и правилна мотивација. Додека некои чекаат можности, други ги создаваат. Важно е работната средина да поттикнува напорна работа и проактивност, бидејќи вистинската награда доаѓа кај оние што се спремни да ја освојат.

СЛИКА

Што можат да направат менаџерите?

Добрите лидери знаат дека мотивацијата не е универзален концепт. Тоа е комбинација од материјални и нематеријални фактори. Освен платата, тука се и:

• Признавање и пофалби – Понекогаш едноставното „Одлична работа!“ може да има поголем ефект од финансиски бонус. Важно е успехот на вработените да се истакне и да им се даде до знаење дека нивниот труд е вреднуван.

• Прослави на успесите – Не е потребен голем настан, но обележувањето на важни достигнувања – дали тоа е успешен проект, нов клиент или подобрување во работата – создава позитивна атмосфера и го зајакнува тимскиот дух.

• Јасна визија и цел – Луѓето сакаат да знаат зошто работат нешто. Кога тимот има заедничка мисија, мотивацијата расте. „Ова е нашата цел – да ја освоиме заедно!“ е поефективно од рутински задачи без смисла.

• Предизвици и развој – Добрите вработени сакаат да напредуваат. Ако работата стане монотона, ќе се намали и нивниот ентузијазам. Балансот помеѓу успехот и предизвиците е клучен – вработените треба да се чувствуваат компетентни, но и постојано да учат нешто ново.

Реална мотивација: Баланс помеѓу труд и награда

За да функционира системот на награди, неколку принципи би требало да бидат задоволени:

• Јасна врска меѓу трудот и наградата – Вработените треба да знаат дека подобрата работа носи подобри резултати, било тоа да е финансиска стимулација, признание или поголема одговорност.
• Праведна распределба – Ако разликите во платите не одразуваат реални разлики во вложениот труд, мотивацијата опаѓа. „Добрите“ и „лошите“ работници не треба да бидат третирани исто.

• Континуирана поддршка – Луѓето не сакаат само финансиска компензација, туку и чувство дека нивната работа е важна. Лидерството не треба да биде само за критики, туку и за градење на тимот преку позитивна мотивација.

Повеќе награди, помалку казни?

Класичната „стап или морков“ стратегија сè уште е присутна во многу компании. Додека наградите го зголемуваат ентузијазмот, казните најчесто предизвикуваат отпор и демотивација. Најдобар пристап е да се наградуваат позитивните однесувања, а неправилностите да се коригираат преку конструктивен фидбек и јасно поставени очекувања.

Мотивацијата е повеќе од бонус

Компаниите што сакаат продуктивни и задоволни вработени не смеат да се потпираат само на финансиски стимулации. Личната сатисфакција, признанието, можностите за раст и пријатната работна средина играат огромна улога.

На крајот на денот, најмотивирачкиот фактор не е само поголемата плата – туку чувството дека трудот се вреднува, дека вработените се ценети и дека имаат цел што вреди да се постигне.